Heimsókn bæjarstjórnar og skipulagsnefndar í Sveitarfélagið Ölfus
23. júní 2023
Fulltrúar bæjarstjórnar og skipulagsnefndar auk starfsmanna bæjarins og Alta ráðgjafar sem vinnur með Sveitarfélaginu Vogum í tengslum við fyrirhugaða atvinnuuppbygginu á Keilisnesi.
Bæjarstjórn og skipulagsnefnd Voga fóru á dögunum í vinnuferð og heimsóttu Sveitarfélagið Ölfus og kynntu sér þá miklu atvinnuuppbyggingu sem hefur átt sér stað í sveitarfélaginu á síðustu árum. Heimsótti hópurinn meðal annars fiskeldisstöð fyrirtækisins Landeldi hf. sem vinnur að uppbyggingu fiskeldis í Þorlákshöfn en þar er stefnt að því að ala allt að 52 þúsund tonn af laxi árlega. Eru þetta mestu áform um landeldi sem uppi eru hér á landi. Landeldi hf. hefur hafið eldi í fyrsta áfanga stöðvarinnar og er að ljúka umhverfismatsferli fyrir næstu tvo áfanga.
Elliði Vignisson bæjarstjóri í Ölfusi og Sigmar B. Árnason sviðsstjóri umhverfis- og framkvæmdasviðs tóku á móti hópnum í ráðhúsi Ölfuss og fóru yfir stefnumörkun sveitarfélagsins og sögðu frá áherslum og reynslu þeirra af uppbyggingu verkefna tengdum matvælaframleiðslu í sveitarfélaginu.
Meðfylgjandi eru nokkrar myndir frá heimsókninni.
