Breytingar á þjónustuaðilum úrgangs á Suðurnesjum

Terra umhverfisþjónusta hefur frá árinu 2018 séð um hirðu úrgangs frá heimilum á Suðurnesjum og var sá samningur framlengdur um eitt ár á meðan breytingar þessar stóðu yfir. Í haust var þjónustan svo boðin út þegar Kalka auglýsti eftir tilboðum í hirðu úrgangs frá heimilum í öllum sveitarfélögunum á Suðurnesjum.

Niðurstöður útboðsins urðu þær samið var við tvo aðila og skiptist það með eftirfarandi hætti:

• Hirða á matarleifum og blönduðum úrgangi frá heimilum í sveitarfélögum á Suðurnesjum verður áfram í höndum Terra umhverfisþjónustu og verður hirðing á tveggja vikna fresti.
• Hirða á pappír / pappa og plastumbúðum frá heimilum í sveitarfélögum á Suðurnesjum verður í höndum Íslenska gámafélagsins og verður hirðing á fjögurra vikna fresti.

Samningarnir við báða aðila eru gerðir til sex ára með möguleika á framlengingu um eitt ár í senn, tvisvar sinnum, og taka þeir gildi frá og með 1.febrúar 2024.

Vinna við gerð dagatala þar sem íbúar sjá hvenær hirt er við þeirra heimili er nú í fullum gangi og verður birt við fyrsta tækifæri.

Einnig er unnið að gerð dagatals sem sýnir losunardaga grenndarstöðva í sveitarfélögunum sem verður einnig gert aðgengilegt þegar það er tilbúið.

Við bindum miklar vonir við aukinn árangur í flokkun á svæðinu og hlökkum til samstarfsins við Íslenska Gámafélagið og Terra umhverfisþjónustu en ekki síður við íbúana á svæðinu.