Frístunda- og menningarnefnd Sveitarfélagsins Voga

Farið yfir Fjölskyldudaga 2015 og hvernig til tókst. Skoðuð dagskrá hátíðarinnar og farið yfir punkta sem komu fram á samráðsfundi sem haldinn var með forsvarsmönnum þeirra félaga sem komu að hátíðinni. Fjölskyldudagar þóttu almennt takast vel og er almenn ánægja með hátíðina. Á næsta ári verður 20 ára afmæli Fjölskyldudaga og því var rætt um að gaman væri að dagskráin 2016 tæki á einhvern hátt mið af því. Ýmsar hugmyndir ræddar í því sambandi, t.d. að rækta vinabæjarsamstarf við Fjaler.

Farið yfir starfsemi vinnuskólans í sumar. Skýrsla um vinnuskólann liggur fyrir þar sem helstu upplýsingar um starfsemina koma fram. Sumarið gekk vel og var veður sérstaklega hagstætt. Heldur færri nemendur voru í vinnuskólanum en oft áður og virðist það vera þróunin í sveitarfélögum almennt. Sameiginleg sumarhátíð vinnuskólanna var haldin í Grindavík þar sem ungmenni frá Vogum, Garði, Sandgerði og Grindavík fengu fræðslu, grillveislu og skemmtun sem var afar vel heppnuð.

Frístunda- og menningarfulltrúi fór yfir sumarstarfið og bækling um það sem gefinn var út í vor. Leikjanámskeið voru nokkuð vel sótt og gengu vel. Dagskráin var fjölbreytt og þátttökugjöldum stillt í hóf. Líkt og undanfarin ár voru ungmenni úr vinnuskólanum til aðstoðar á námskeiðunum og gafst það mjög vel.

Félagsstarf hófst í Álfagerði miðvikudaginn 2. september með félagsvist og kaffi. Farið var yfir bækling um félagsstarfið sem gefinn hefur verið út. Öldungaráð hefur mótað dagskrá fram að áramótum í samstarfi við starfsmann félagsstarfsins. Þar kennir ýmissa grasa og útlit fyrir blómlegt starf í vetur. Ráðgert er að eldri borgarar kjósi í nýtt öldungaráð í október.

Starfsemi félagsmiðstöðvar er hafin. Búið er að manna allar stöður og verður kosið í unglingaráð á næstunni. Unglingaráð kemur síðan að skipulagningu og framkvæmd í samráði við starfsfólk félagsmiðstöðvar og skóla.

Rætt um möguleika þess að halda dag félagasamtaka í Vogum nú í haust. Þar gætu starfandi félög í sveitarfélaginu m.a. kynnt vetrarstarfið fyrir íbúum. Samþykkt að halda slíkan dag í október og er frístunda- og menningarfulltrúa falið að kanna hug félagasamtaka til þátttöku í verkefninu.

Vinna við fjárhagsáætlanagerð 2016 er að hefjast. Rætt um mikilvægi þess að FMN taki þátt í þeirri vinnu og móti sínar hugmyndir og áherslur. Stefnt að því að koma með tillögur á næsta fund nefndarinnar sem fyrirhugaður er í október.

Fundargerðir lagðar fram og ræddar.