Fræðslunefnd Sveitarfélagsins Voga
Mættir voru: Helga Friðfinnsdóttir, Fanney Ingvaldsdóttir, Bergur Álfþórsson, Oktavía
Ragnarsdóttir, Snæbjörn Reynisson, Dagmar Eiríksdóttir og Áshildur Linnet sem jafnframt ritaði
fundargerð.
Fundur settur kl. 18:17
1. Reglur um skólabifreið
Umræður um reglur um skólaakstur
Guðbjörg Kristmundsdóttir mætti til fundar kl. 18:35
Farið yfir athugasemdir sem bárust frá sveitastjóra og reglurnar lagðar fram í samræmi við
þær breytingar. Þær verða því sem hér segir:
1. gr.
Skólabifreið
Vatnsleysustrandarhreppur útvegar bifreið til skólaaksturs og skal sjá til þess að bifreið sú er
notuð er til skólaakstursins uppfylli öll ávæði laga, reglugerða og settra reglna um gerð,
búnað og merkingu sem í gildi eru á hverjum tíma.
Vatnsleysustrandarhreppur skal sjá til þess að bifreið sú er notuð er til skólaakstursins sé
vátryggð sem og farþegar og bifreiðastjóri. Vatnsleysustrandarhreppur tryggir jafnframt að
bifreiðastjóri hafi gild ökuréttindi.
Rekstrarkostnaður skólabifreiðar greiðist af sérmerktum lið á fjárhagsáætlun Stóru-
Vogaskóla. Skólabifreiðastjóri er einn af starfsmönnum skólans og er undir verkstjórn
skólastjóra. Akstur í þágu annarra stofnana hreppsins er gjaldfærður á þær, samkvæmt
gjalskrá sem samþykkt er af hreppsnefnd.
2. gr.
Áætlun
Daglegur skólaakstur er samkvæmt skólaakstursáætlun sem skólastjóri vinnur í upphafi hvers
skólaárs í samræmi við kennsluskipan og aðrar þær þarfir nemenda fyrir akstur sem
samkomulag er um að uppfylla.
Bifreiðastjóri skal kappkosta að gera hverja ferð sem þægilegsta fyrir farþega sína og halda
áætlun eins og kostur er. Virða ber ákvarðanir skólayfirvalda um komutíma skólabíls að og
frá skóla. Bifreiðastjóri má ekki sinna einkaerindum með skólabörn í bílnum né láta slík
erindi seinka skráðri brottför skólabíls.
Hafa skal samráð við skólastjóra ef nauðsyn er talin að fella niður ferð, hafa skal opinn
farsíma ef breyta þyrfti áætlun. Skólastjóri eða staðgengill hans tilkynnir ökumanni um frávik
frá venjubundinni ferðatilhögun og/eða tímasetningu jafnskjótt og slíkar ákvarðanir liggja
fyrir.
2
Börn eru sótt á fyrirfram ákveðnar biðstöðvar og á skólalóð á skólabifreið sérmerkt stæði. Á
Vatnsleysuströnd skal miðað við að börn í 4.-10. bekk séu tekin uppí skólabíl við þjóðveg
420, Vatnsleysustrandarveg. Um börn í 1.-3. bekk skal sú regla gilda að þau séu sótt heim að
því gefnu að heimkeyrsla að húsi sé þannig búin að hægt sé án vandkvæða að snúa
skólabílnum við á hlaðinu við húsið.
Bifreiðastjóri og skólastjóri skulu í sameiningu leggja á það mat í upphafi skólaárs hvort
heimkeyrsla og hlað standist þau skilyrði að hægt sé að snúa skólabifreið við án þess að
stefna öryggi farþega, bíls, bílstjóra og heimilisfólks í hættu. Breytilegar aðstæður, s.s. vegna
ófærðar, hálku eða annarra umhverfisþátta geta orðið til þess að ekki sé ekið heim að húsi.
Skólastjóra er heimilt að gera undanþágu á ákvæði um biðstöðvar fyrir börn í 4.-10. bekk s.s.
í tilfellum líkamlegra og/eða andlega fatlaðra barna.
3. gr.
Öryggi farþega
Bifreiðastjóri skal aðstoða börn í og úr bíl eftir þörfum. Bifreiðastjóri fylgist með því að
börnin séu fest í öryggisbelti.
Bifreiðastjóri getur tekið ákvörðun um að aka ekki ef aðstæður eru víðsjárverðar. Skal
skólastjórnendum tilkynnt um slíka ákvörðun jafnfljótt og ákvörðun liggur fyrir.
4. gr.
Hegðun í skólabifreið
Nemendur skulu fara eftir almennum skólareglum hvað varðar umgengni um skólabifreið.
Skulu þeir fara eftir óskum bílstjóra í akstri og sitja í sætum sínum með spennt belti.
Jafnframt skulu nemendur leggja sig fram um að trufla ekki bílstjóra í akstri.
5. gr.
Trúnaður og þagnarheiti
Bifreiðastjóri er bundinn trúnaði og þagnarheiti um öll þau mál er hann kann að fá vitneskju
um í starfi sínu og snerta einstaka nemendur, foreldra þeirra eða aðstandendur.
Skólabifreiðastjóri hefur upplýsingarskyldu til skólastjóra um þau mál sem upp kunna að
koma
6. gr.
Notkun skólabifreiðar utan áætlunar
Um lán á skólabíl skal gilda sú regla að skólabifreiðin er ekki lánaður til einstaklinga eða
félagasamtaka. Félagasamtök geta átt kost á því að fá skólabirfreið leigða með bifreiðastjóra.
Að öðru leyti skal notkun hans miðast við starfsemi á vegum hreppsins og að honum sé ekið
af bifreiðastjóra á vegum hans sem hafi til þess gild ökuréttindi.
2. Agamál í Stóru-Vogaskóla
Áshildur spurðist fyrir um stöðu agamála í dag og hvort breytingar hafi orðið. Snæbjörn
greindi frá því nú er verið að herða á reglum um eftirfylgni vegna brottvísana úr tímum. Í
öllum slíkum tilvikum verður foreldri/forráðamaður látinn sækja viðkomandi nemanda í skóla
3
og fera upp þau mál við kennara/skólastjórnendur. Ýmist strax eða á hentugum tíma innan
vinnuramma kennara. Í millitíðinni sæki nemandi ekki aðrar kennslustundir. Helga nefndi að
hún þekkti til þessa úrræðis og það gæfi mjög góða raun. Í þessu reyni á samábyrgð nemanda,
kennara og foreldra.
Helga spurðist fyrir um hvort búið væri að halda fund með foreldrum og nemendum 8.bekkjar
sem vísað er til í bréfi Jóns Inga dags. 19. október 2005. Greindi Snæbjörn frá því að ekki
væri búið að halda umræddan fund en hann væri á dagskrá og væri í samvinnu við
Þjóðkirkjuna.
3. Önnur mál
a) Rætt um málefni mötuneytis. Dagmar greindi frá því að foreldrafélagið væri að
skoða matseðla grunnskólans. Snæbjörn greindi frá því að hann hefði borið
saman matseðla nokkura skóla og að þeir hafi verið mjög svipaðir. Snæbjörn
nýtti tækifærið og hvatti fólk til að leggja fram formlegar athugasemdir hafi það
einhverjar. Helga spurðist fyrir um hvernig afgreiðslan í matartímum gengi og
greindi Snæbjörn frá því að hún gengi mjög vel.
b) Bergur spurðist fyrir hvort vantaði fulltrúa í foreldraráð. Svaraði Snæbjörn því að
það væri rétt. Verið er að leita að nýjum fulltrúa og óskaði Snæbjörn eftir
tillögum.
c) Bergur ítrekaði fyrirspurn um námsefni frá 9. fundi. Snæbjörn hyggst kanna
málið og koma með svar á næsta fundi nefndarinnar.
d) Oktavía spurðist fyrir um hvernig nýju kennurum skólans gengi í starfi. Greindi
Snæbjörn frá því að þeim gengi mjög vel.
Fleira ekki rætt og fundi slitið kl.19:50
Til næsta fundar er boðað 27. desember
