Umhverfisnefnd Sveitarfélagsins Voga
4. fundur umhverfisnefndar 2006 - og fyrsti fundur nýskipaðrar nefndar, var haldinn
þriðjud. 4. júlí kl. 17 í Stóru-Vogaskóla.
Mætt voru: Þorvaldur Örn Árnason, Margrét Ingimarsdóttir, Helga Ragnarsdóttir, Snæbjörn
Reynisson og Guðbjörg Theódórsdóttir. Helga ritar fundargerð.
Dagskrá
1. Nefndarmenn kynna sig
Nefndarmenn kynntu sig og nauðsynlegar upplýsingar voru uppfærðar.
2. Verkaskipting nefndarinnar
Þorvaldur Örn formaður nefndarinnar stingur upp á að Helga verði varaformaður og
Snæbjörn ritari. Tillagan er samþykkt samhljóða.
3. Erindisbréf – leitað eftir athugasemdum eða skýringum
Þorvaldur fór yfir viðbætur sem gerðar hafa verið við erindisbréf fyrri nefndar.
Nefndarmenn gerðu engar athugasemdir við efni þess að svo stöddu.
4. Málaskrá (vinnuskjal) kynnt og kannað áhugasvið nefndarmanna með það
fyrir augum að koma á einhvers konar verkaskiptingu við undirbúning og
úrvinnslu mála
Nefndarmenn fóru yfir athugasemdir sínar við skjalið og gerðu grein fyrir helstu
áherslumálum sínum.
5. Fundir í sumar
Næsti fundur verður vinnufundur þar sem sveitarfélagið verður skoðað í heild og
tillögur settar fram hverjir hljóta umhverfisviðurkenningu 2006. Fundurinn verður
haldinn mánudaginn 10. júlí.
6. Störf síðustu umhverfisnefndar og nefndar um umhverfisstefnu
Þorvaldur fór stuttlega yfir málið og kynnti nefndarmönnum.
Farið var yfir vinnu við umhverfisstefnu og drög að henni kynnt. Hugmyndir að
áframhaldandi vinnu við stefnuna tíundaðar.
7. Gúmmíkurl á sparkvelli, vegna fyrirspurnar íbúa í Vogum
Haft var samband við Umhverfisstofnun varðandi málið. Farið var yfir svar þeirra og
niðurstöður. Samkvæmt þeirra ráðum er mælt með að notað verði hrágúmmí í stað
dekkjakurls þegar endurnýja þarf, þar til betri vitneskja liggur fyrir um hugsanlegar
líkamlegar aukaverkanir.
8. Erindi frá bæjarstjórn vegna Leiðsögumanna Reykjaness ses
Erindið er kynnt. Félagið vinnur frumkvöðlastarf við eflingu ferðaþjónustu á
Reykjanesi sem fellur vel að hugmyndum að stefnu sveitarfélagsins Voga í atvinnu-
og ferðamálum. Nefndin leggur til að tekið verði jákvætt í erindið og félagið stutt með
einhverjum hætti enda mega íbúar sveitarfélagsins vænta góðs af starfsemi þess.
9. Erindi frá bæjarstjórn vegna endurútgáfu Sögufélags og Örnefnastofnunar
Íslands á Sýslu- og sóknarlýsingu Gullbringu- og Kjósarsýslu, frá um 1840
Erindið er kynnt. Nefndin leggur til að tekið verði jákvætt í erindið. Útgáfan fellur
vel að hugmyndum um að rita sögu sveitarfélagsins og að vekja áhuga bæjarbúa á
umhverfi sínu og sögu.
10. Erindi frá Snæbirni Reynissyni um vinnu Hauks Aðalsteinssonar að
sjávarútvegssögu Vatnsleysustrandarhrepps
Erindið er kynnt. Andrés Guðmundsson, Heiðargerði 24 í Vogum, setti sig nýverið í
samband við fráfarandi formann menningarnefndar og bauð fram styrk til handa Hauki
Aðalsteinssyni til að safna efni til útgerðarsögu byggðarlagsins. Aðilar sem Andrés er
í forsvari fyrir vilja styrkja hann til verksins, greiða laun svo hann geti lokið því.
Haukur hefur verið að rannsaka sjávarútvegssögu Vatnsleysustrandarhrepps. Hann
hefur safnað miklum gögnum, smíðað líkön af skipum og mælt upp húsarústir.
Umhverfisnefnd fagna þessu þarfa framtaki og leggja til að Snæbjörn verði tengiliður
nefndarinnar við Andrés og Hauk um áframhaldandi vinnu við verkið.
11. Erindi frá bæjarstjórn vegna vélhjólaaksturs utan vega
Erindið er kynnt. Vísað er til bókunar umhverfisnefndar frá 10. apríl sl. mál nr. 5.
Hugsanlega mætti taka þetta mál til athugunar í vinnu við nýtt aðalskipulag.
12. Erindi frá bæjarstjórn um tilhögun refa- og minnkaveiða og skráningu grenja
Erindið er kynnt. Upplýsingar vantar um hvernig þessum málum hefur verði háttað í
sveitarfélaginu hingað til.
Málinu er frestað.
Fleira var ekki gert og fundi slitið kl. 19:25
