Umhverfisnefnd Sveitarfélagsins Voga
9. fundur umhverfisnefndar var haldinn miðvikudaginn 31. október 2007 að Iðndal 2.
Fundinn sátu: Þorvaldur Örn Árnason, Rakel Rut Valdimarsdóttir,
Eric dos Santos, Guðbjörg Theodórsdóttir
og Helga Ragnarsdóttir sem jafnframt ritar fundargerð.
Dagskrá
1. Fræðsluskilti
Vinnsla er í fullum gangi og gengur vel.
2. Skráning fornleifa í sveitarfélaginu
Fornleifastofnun Íslands og Sveitarfélagið Vogar hafa gert með sér samning um
skráningu fornleifa í sveitarfélaginu. Skráning er hafin og er áætlað að henni verði
lokið 2013. Umhverfisnefnd fagnar samningnum og að vinna við þetta áríðandi mál
sé hafin.
3. Aðalskipulag Voga 2007 – 2027
Þjóðleiðir, örnefni og fornminjar
Þorvaldur fór yfir fjölmörg atriði sem hann ásamt Sesselju Guðmundsdóttur, Viktori
Guðmundssyni og Jóhönnu Guðmundsdóttur hafa gert að tillögu að verði leiðrétt
og/eða verði bætt við á uppdrætti og í greinargerð.
Nánari útlistun er í fylgiskjali.
Skógræktarsvæði (sjá 2.3.1 O-5)
Svæðið ofan Brunnastaðahverfis verði stækkað til austurs þannig að það nái inn í
Lágar og þar með yfir svæðið þar sem nemendur Stóru-Vogaskóla hafa gróðursett
vor hvert undanfarinn áratug.
Svæðið við Háabjalla verði stækkað til norðurs meðfram bjallanum þannig að það
nái að undirgöngunum og jafnvel áfram vestan við þau og suður að mörkum lands
Grindavíkur, sbr. trjáreit milli Reykjanesbrautar og gamla Keflavíkurvegar.
Rök fyrir stækkun: Búast má við auknum áhuga á trjárækt vegna bindingar
koltvíoxíðs og gæti þurft meira rými til næstu 20 ára. Ekki er æskilegt að
gróðursetja of þétt, æskilegt að hafa opin rjóður víða inn á milli þannig að
skógræktarsvæðin henti vel til útivistar.
Merking hverfisverndar
Svörtu yfirstrikin frá Umhverfisstofnun til að afmarka svæði á náttúruminjaskrá eru
mun meira áberandi en hvítu strikin sem merkja hverfisvernd. Getur valdið ruglingi.
Einnig er afmörkun Umhverfisstofnunar víða ónákvæm. Lagt er til að merkingum
verði breytt þannig að náttúruminjar verði minna áberandi en hverfisverndin.
Verndun túna
Bætt verið í hverfisverndarskilmála H-1 að æskilegt sé að viðhalda túnum á
Vatnsleysuströnd með því að slá þau eða beita. Verði það ekki gert má búast við að
þau breytist í óræktarmóa eða kjarrlendi.
Hófleg beit kinda og hrossa getur verið liður í að viðhalda búsetulandslagi. Flest
túnin í Vogum hafa nú horfið undir byggð en á Vatnsleystuströnd eru mörg tún, að
vísu ekki stór.
Önnur atriði
Nefndin leggur til að sett verði inn lítið athafnasvæði ofan við mislægu gatnamótin
ofanverð. Þar væri einungis hægt að setja upp aðstöðu fyrir farþega áætlunarbíla og
jafnvel bensínstöð.
Merkja ætti inn Sprengjusvæðið við Skógfellaveg og Miltisbrandssvæðið við
Sjónarhól, ef ekki á kortið þá í greinargerðina.
Lýsa ætti sveitarfélagið kjarnorkuvopnalaust svæði og banna alla umferð farartækja
með kjarnorkuvopn, sbr. yfirlýsingar flestra annarra sveitarfélaga á Íslandi?
4. Háspennulínur í landi Voga
Bæjarstjórn vísaði til nefndarinnar erindi varðandi háspennulínur í landi Voga.
Nefndin gefur eftirfarandi umsögn um málið:
Að vel athuguðu máli leggur umhverfisnefnd til að öllum fyrirliggjandi valkostum
Landsnets um loftlínur verði hafnað með framtíðarhagsmuni íbúa Sveitarfélagsins
Voga og náttúruvernd í huga. Nefndin álítur að svo miklar raflínur muni spilla
ásýnd lands okkar og hefta möguleika til atvinnusköpunar, útivistar og annarrar
landnýtingar til frambúðar. Ekki verður heldur séð að þörf sé fyrir svo stór, og
afkastamikil mannvirki jafnvel þó virkjanir stækki og jafnvel þó 250.000 tonna
álver yrði byggt í Helguvík.
Til að styrkja raforkudreifingarkerfið á Suðurnesjum mælir nefndin með jarðstreng
sem lagður verði þétt meðfram Reykjanesbraut og að núverandi lína fái að halda
sér. Sú lausn þarf ekki að verða mikið dýrari en loftlínur ef umhverfiskostnaður er
tekinn með í dæmið.
Verði byggður upp verulega orkufrekur iðnaður á Helguvíkursvæðinu vill nefndin
að skoðaður verði sá kostur að leggja sæstreng milli Flekkuvíkur og Helguvíkur.
Samkvæmt nýlegum rannsóknum eru áhrif sæstrengs á botndýralíf lítil. Þannig yrði
sjónmengun engin og leiðin að auki styttri en landleiðin.
5. Fréttir af umhvefisþingi
Frestað
6. Pistlar umhverfisnefndar á vogar.is
Pistlar frá umhverfisnefnd munu framvegis birtast undir liðnum pistlar, á heimasíðu
sveitarfélagsins.
Fleira ekki gert og fundi slitið kl. 20:20
